نوروز ۱۴۰۱ عرفه‌سینده، تورکجه، کوردجه وعربجه ششرنگین ایشه باشلادیغینی بیلدیریریک
بو اورتاق آجی،
هئچ بیر زامان آیری آیری،
ساغالماز!
شش‌رنگ، ۱ فروردین ۱۴۰۱دن اعتیبارن بوتون خبرلر، اؤیرتیم بیلگی‌لری و ویدیولارینی ۴ دیلده -تورکجه، عربجه، کوردجه و فارسجا- یارادیب، یایینلایاجاقدیر. اینگیلیزجه‌نین هله ده بین‌الخالق فعالیت‌لریمیزده قول‌لانیلاجاغی و فارسجانین اورتاق دیلیمیز اولاراق قالماسی آیدین‌دیر.
بیر چوخ عاییله، بو توپلوما عایید شخص‌لر، متخصیص‌لر و جنسی یؤنلیم، جینسیتی کیملیک، جینسیتی ایفاده و جینسی گؤستَریجی‌لره دایالی آیری‌سئچکیلیک‌لرین قالدیریلماسینی دستک‌له‌ین شخص‌لرین سوال‌لارینی اورتایا قویماق اوچون بیزه و باشقا قایناق‌لارا اوز گتیرمه‌سی، بیزیم اوچون اؤنملی بیر گرکلی‌لیغی اورتایا چیخارتدی:
بو بیلگی‌لره احتیاجی اولان اَن اوزاق بؤلگه‌لرده یاشایان و توپلومون فرقیلی کسیم‌لرینه عایید اولان و ایل‌لا فارس دیللی اولمایان شخص‌لره بیلگی وئرمک و عمومی بیلینج یاراتماق اوچون اورتاق دیلین اولماماسی.
بیرچوخ هموسکسوال، بی‌سکسوال و ترنس یئنی‌یئتمه‌نین حیاتی اونلارین جینسی یؤنلیم و کیملیک‌لری‌نین عاییله‌لری طرفیندن قبول ائدیلمه‌سینه باغلی‌دیر. عاییله‌لرین بو مساله‌نی قبول ائتمه‌لری ایسه بیزیم بوعاییله‌لرله بیرباشا اؤز آنا دیل‌لری ایله ایرتیباط قورامادیغیمز سوره‌جه گرچکلشمه‌یجک‌دیر.
بو گرکلی‌لیک سایه‌سینده، ائتنیکی قوروپ‌لارا عایید اولماق، علیل‌لیغی اولان و یا سؤمورولن صینیف‌لارا عایید اولماق نتیجه‌سینده نئچه قات آیری‌سئچکیلیک‌لره معروض قالان شش‌رنگ چالیشانلاری، نئچه دیللی سوسیال شبکه‌لر یاراتماق ایده‌سینی دوشونوب، دارتیشیب و بیر ائیتیم سوره‌سی، دنمه/یانیلما و بیزی تعقیب ائدن توپلولوغون فیکیرلرینی آلدیقدان سونرا، بو ایده‌نی بو گوندن اعتیبارن تورکجه، کوردجه و عربجه اینستاگرام صحیفه‌لری واسیطه‌سی ایله و شش‌رنگ اینترنت صحیفه‌سینده بنزر بؤلوملرله حیاتا کئچیرمکده‌لر.
بو ایلک دفعه‌دیر کی اینسان حاقلاری ساحه‌سینده چالیشان بیر ان.جی.او (اونو دا لِ‌گِ‌بِ‌تِ‌آی توپلومونا عایید بیر قوروم)، سوسیال آیری‌سئچکیلیغین ایچ ایچه اولدوغونو آنلاییب، فارسجانین یانیندا باشقا دیل‌لرده ده گلیشمه و بیلینجلندیرمه پنجره‌سی آچیب و آیری‌سئچکیلیغا و باسقی‌یا معروض قالان فرقیلی گوروپ‌لارین آراسیندا سوسیال بیرلیک و اِمپاتینی رکلام ائدیب و اونون یایقینلاشماسی اوچون چالیشماقدادیر.
بوندان سونرا هئچ بیر تورک آنا سوال‌لارینی بیزه فارسجا گؤندرمک زوروندا دئییل، هئچ بیر کورد آتا اوشاغینی آنلاماق اوچون فارسجا ویدیولارا قولاق آسماق زوروندا قالمایاجاق و هئچ بیر عرب آنا و یا باجی بیزیم پایلاشیم‌لاری فارسجا اوخوماسی گرکمیر. بئله‌لیکله دواملی اولاراق گؤرمزدن گلینن لِ‌گِ‌بِ‌تِ‌آی توپلولوغونا عایید فارس اولمایان شخص‌لرین بیر چوخونون عاییدیت و وارلیق حیسی بیزه یئنی‌دن قاییداجاق.
بو بؤیوک پروقرامی باشاریلی بیر شکیلده قاباغا آپارماق اوچون، سیزین دواملی و شفقتلی کمه‌لیغینیزا، قاتیلیمینیزا و فیکیرلرینیزه احتیاجیمیز وار. اؤز آنا دیلینیزده حیس‌لرینیزی و احتیاجلارینیزی داها یاخشی ایفاده ائدن سیزین هامی‌نیزا. دیل ائولری ایل‌لا فارسجا اولمایان هرکسه. بیز ششرنگین ائتینیکی گوروپ یولداشلاری، بوتون دیل‌داشلاریمیزی بیزه خبر و یا ماراخلاندیغینیز یازیلارین چئویریسینی گؤندرماغا دعوت ائدیریک. بیزه فرقیلی دیل‌لرده مدنیت یاراتماغین یانیندا جینسی و جینسیتی عدالت ایله ایلگیلی قونولاردا دا تورکجه کوردجه و عربجه دیل‌لرینده زنگین بیر آرشیو یاراتمامیزا کمه‌لیق ائدین.
بیز بوتون اؤتکی‌لشدیریلمیش، آیری‌سئچکیلیغا معروض بوراخیلمیش و سیتم آلتیندا یاشایانلارین دایانیشماسی اوچون، برابرلیک و گوج ایله ثروتین برابر بیر شکیلده داغیتیلماسی سلوقانی ایله هرکس اوچون ساحه‌یه گلمیشیک. بیز بو دایانیشمانی دموکراسی و جینسی-جینسیتی آزینلیقلار توپلولوغونون اوستونده‌کی باسقی‌نین قالدیریلماسی‌نین ایلک شرطی اولاراق بیلیریک. بو یولدا باشاری الده ائتمک اوچون الیمیزی سیزه اوزادیریق.
شش‌رنگه اؤز آنا دیلینیزده گلین. اونون ایچریک‌ینی گلیشتیرمه‌یه چالیشین و هر زامانکی کیمین شش‌رنگی اؤزونوزدن بیلین. اساس جریان مدیالاریندان کئچمیشدن داها چوخ بو فرقیلی سس‌لرین یاییلماسینا کمه‌لیق ائتمه‌لرینی ایسته‌ییریک و اینسان حاقلاری تشکیلاتلاریندان و فارس اولمایان ائتنیک‌لره عایید اولان مدیالاردان بیزیم سسیمیزی یانسیتمالارینی ایسته‌ییریک. بیز آرتیق اؤز دیلیمیزده موجادیله ساحه‌سینده وار اولدوغوموزا گؤره، اؤز دیلیمیزده مدیالار طرفیندن دستکلنمک ایسته‌ییریک.
شش‌رنگ ۱۲ ایله یاخیندیر بیلینجلندیرمه، عدالت اوداخلی سؤیلمین یاییلماسی، سوسیال آیری‌سئچکیلیک‌لره و ایرانلی لِ‌گِ‌بِ‌تِ‌آی‌لارا (هموسکسوال، بی‌سکسوال، ترنسجندر) اولان نفرت سؤیلمینه قارشی اورقانیزه بیر شکیلده موجادیله ائدیب، چالیشماقدادیر.
بیز اینانیریق، گلجکده‌کی دییشیکلیک‌لرده ایرانلی لِ‌گِ‌بِ‌تِ‌آی‌لارین ایستکلری‌نین دامقاسی واردیر. بو ایستک‌لر هر هانسی بیر دیلده و بو توپراغین هر هانسی بیر نقطه‌سینده باغیریلمالی‌دیر.
یاشاسین اؤزگورلوک، یاشاسین دایانیشما
شش‌رنگ (ایرانلی لزبین‌لر و ترنسجندرلر شبکه‌سی)
۱۷ مارس ۲۰۲۲ (۲۶ اسفند ۱۴۰۰)
ششرنگین تورکجه، کوردجه و عربجه صحیفه آدرس‌لری:
https://www.instagram.com/6rangiran_Turk
دیدگاه خود را ثبت کنید
تمایل دارید در گفتگوها شرکت کنید؟در گفتگو ها شرکت کنید.